學習過程

20個月大的笨 C
開始練習不用片片了
日間時候，我地俾佢享受一下通爽涼快o既感覺
唔駛佢著尿片
然後每個鐘頭抱佢去坐便盆
等佢習慣用便盆大小便
希望佢早日戒片

然而，笨 C 只享受通爽，但不享受坐便盆
但呢個妹妹冇乜耐性
又未習慣坐便盆
所以每次都要同佢角力一番

冇著片的笨 C，更加要看牛咁看
因為佢好鍾意爬上梳化玩
有時便意一來，就 ..............



為左讓笨 C 知道在梳化小便係唔o岩o既
我地會以誇張o既表情動作話佢知
佢整污糟左個梳化坐墊 ...



佢企定定望住個坐墊唔出聲 ... 好似有o的明白



裝出一副無辜o既樣 ... 



無辦法喇！有個小朋友o係度，呢o的"意外"真係好難免
唯有立刻除晒o的椅套去洗
幸好椅套夠厚，今次竟然冇波及到墊褥

嫲嫲在換另一套新椅套
笨 C 好似又忘記晒佢剛做完的曳野
又彈上梳化攪攪震了 ~



我地都明白，訓練 bb 戒片真係一場勞心勞力o既過程
但始終要經歷，也要面對當中可能發生的麻煩
呢o的可能要做過父母才會明白

有時會在網上論壇看到一些對小朋友行為o既評價
或者對某些父母教養小孩方面o既意見
每次看到，我也會反省和警剔自己
唔好俾笨 C o既扭計野蠻行為影響到其他人
但有時實在很無奈
因為我想大部分父母都會注重子女行為吧
但始終小朋友就係小朋友
佢地心智未足以明白某些行為是對或錯、或會否影響其他人
做父母的，在家裡可以打可以鬧，鬧完慢慢教
但在街上，為避免對其他人製造更多滋擾
往往會用一些"權宜之計"
例如搵部 iPad/ 手機引開小朋友注意力
等佢唔好再攪攪震、嘈嘈閉
但如果就此被看成"唔識教仔" 甚或乎 "教壞個仔"
我只可感歎一句吃力不討好

前陣子，朋友在 facebook 呻
帶著不足兩歲的姨甥仔搭巴士
姨甥仔突然發脾氣、大吵大鬧
身旁的媽媽和姨姨出盡法寶也制止不到
呢個時候，巴士上部分乘客露出厭惡眼光
甚至以不善意o既態度出聲話小朋友"無家教"
叫佢 "behave yourself, control yourself" 之類
我覺得，呢o的人未免太過苛刻了
一個不足兩歲的小朋友，如果識得咩叫 "behave himself, control himself" 的話
應該可算神童吧
如果一個 Trouble Two，可以在大部分時間保持安靜
在我而言，已經算是好乖了  
請明白請理解
做父母的不是不教
而是始終有個學習過程
當天小小孩的你，大概也曾令父母這樣難為過罷 

做父母從來不容易
今日你選擇不做父母
或是你尚未當上父母
也請體諒一下其他人當父母的難處呢 ~

笨B媽媽生活記事 facebook 專頁：http://www.facebook.com/bbmamababa