logo
會員電郵 :  密碼 :    會員登記 忘記密碼
主頁  |  每日熱話  |  MB Store  |  家Fun號外  |  專家信箱  |  會員日誌  |  最新活動  |  課程及講座  | 
搜索

「廣東姑娘嫁福建郎首次回鄉之旅」深圳高鐵篇

已有 530 次閱讀 2014-8-9 23:25 |關鍵詞:深圳 福建


龍媽媽終於有時間可以寫我的褔建廈門之旅啦!無辦法,寫一篇旅遊Blog唔易,單單整相,組織都用上一、兩小時,所以每一篇旅遊記得來不易,所以希望大家會鐘意!


好!入番正題啦!大家睇標題就知道,今次系龍媽媽嫁給龍爸爸後第一次跟龍爸爸返他的鄉下,龍爸爸系福建人,龍媽媽嫁給龍爸爸已經有兩年多啦!龍媽媽的福建話仲系停留在識聽唔識講,聽方面仲要系識少少,所以今次絕對系膽粗粗地跟龍爸爸回鄉去見他的鄉親父老!幸好龍媽媽的「煲冬瓜」仲見得下人,未至於雞同鴨講!


今次的回鄉之旅總共有5日,除了頭2天留了在龍爸爸的老家之外,另外3天就去了,中國最美麗的城市之一廈門,來回我們都系坐高鐵,一行5人,一細四大,就熱熱鬧鬧的地行啦!


呢一篇就由深圳的高鐵講起先!

 


今次都系龍媽媽第一次坐高鐵,坦白說整體感覺唔錯。一張深圳去廈門的二等高鐵票都只系$150.5,相比坐飛機真系平好多,而且全程都只系三個幾鐘,而且非常準時,計起上來和坐飛機的時間差唔多!


其實在未有高鐵時,如果要去廈門很多人都會選擇坐由香港的直通巴士,不過全程要八個小時左右,而且價錢唔平,都要三百幾港元一程,加上坐的空間又窄又逼,所以龍媽媽遲遲都無跟龍爸爸回鄉的其中一個原因就系唔想坐8個鐘的車。


龍媽媽對高鐵的價錢、衛生、準時等方面都非常滿意,唯獨系在購票方面,令龍媽媽對它大打折扣。在香港要買高鐵的票的途徑有2個(以龍媽媽所知),第一個中國鐵路(香港),第二個系中旅社。


中國鐵路(香港)的商店位於紅磡鐵路站G14號舖,該公司不設網上訂票,乘客若需要購買內地高鐵火車票可以到達該店購買。該店只收取港幣,另外每張需加 HK$50 - 100 的手續費。


中國旅行社亦可購買到內地高鐵火車票,車票只收取港幣,而每張車票需另加 HK$50 - 100 手續費,所有車票均由中國旅行社出票,不用到內地車站換票。


呢2間公司都可以買到高鐵票,但收的手續費實在太貴啦,龍媽媽1張去廈門的高鐵票都只系150蚊,但手續費居然去到50蚊,如果一個人去的話都無問題,但龍媽媽要買4張票,正系話要給成200蚊手續費,所以龍媽媽最後決定自已北上到深圳北買票,除了可以買票,仲順便行下當日的路線,計下時間咁!



 


中國鐵路客戶服務中心(網址:http://www.12306.cn/)


假如你有內地的銀行網上戶口,或者你內地的親朋好友有內地網上的銀行戶口,其實可以到高鐵的官方網站購票,網上購票可以購當日計20天內的票,但如果在站內購只可以買18天內的票,而它系用實名購票的,所以買的時候,無論網上定在站內買票都需要回鄉證的資料!


龍媽媽找到一個Blog,內裡有好詳細買高鐵的方法,大家可以參考一下!

http://eddieor.blogspot.hk/2014/01/12306.html

 


高鐵的車站位於深圳北,至於點樣在香港去深圳北車站最快?龍媽媽建議大家可以坐港鐵到落馬洲,一出閘就到福田關口,過了關就可以在福田口岸坐深鐵到深圳北站,坐9個站,大約半個鐘就到,沿途仲唔洗轉線!相反在羅湖去深圳北就比較麻煩!

 


就系咁,龍媽媽當日就一行5人去到深圳高鐵的車站,車站都幾大!

 


因為龍媽媽仲未買回程的票,所以在當日買埋。由於高鐵系唔等人的,所以大家都系預多少少時間去買票或者換票,因為車站系長時間超多人排隊,而且深鐵的效率比較低!

 

除此之外,高鐵的保安非常嚴密,基本上和機場差唔多,首先要入高鐵站之前,就要對票和對身份證,因為買票時系實名買票的,所以張票上系印有身份證號碼,所以系無得轉讓!之後仲要行李和人都要過機!最後先可以入到去深圳北高鐵站!


當日系夏天,天氣勁熱,站內無咩冷氣,幸好站內地方樓頂高,夠大和通風,唔系就焗死左!


 


站內有不少餐廳,價錢就一般,同香港的消費差唔多,一個餐三十幾蚊,不過質素當然無得比,又系食飽你就算,所以大家都系食KFC和麥當勞算,雖然它們的食品最近有些問題,不過相信比那些不知名的更有保障!

 


站內有贈水處,憑票可以換一枝水!

 

 


高鐵會在開車前20分鐘到驗票,將票插入驗票機內就可以進入月台,然後上車,開車前3分鐘無得再驗票,換言之,開車前3分鐘無得再入月台上車,所以大家都系預多少少時間!


最後高鐵的每一得車廂內都有洗手間,洗手間的衛生都唔錯,而且坐位與坐位間夠闊,在坐位上有行李架,可以放行李!而行車時有服務員售賣食物和清潔,行車時車廂都好穩定,和坐地鐵的感覺差唔多,而且仲好準時到達,所以如果下次再回鄉,龍媽媽的首選必定系高鐵,希望香港的高鐵可以快D通車,相信到時會更方便!


今次的「廣東姑娘嫁福建郎首次回鄉之旅」深圳高鐵篇就介紹到咁多,下篇會有龍哈仔回鄉的介紹,希望大家會喜歡龍媽媽今次的介紹!


路過

雞蛋

鮮花

握手

雷人

評論 (0 個評論)

facelist

你需要登錄後才可以評論 登錄 | 會員登記

廣告服務|MyBB.com.hk

GMT+8, 2020-11-26 06:20 , Processed in 0.009246 second(s), 12 queries .

Powered by Discuz! X1.5

© 2001-2010 Comsenz Inc.

x